Më shumë hapësirë për të rinjtë

Institucionet e Kosovës duhet të krijojnë më shumë hapësirë për të rinjtë në mënyrë që ata të jenë pjesë e jetës publike dhe garanci e integrimeve të vendit në strukturat euroatlantike.
Kështu u vlerësua në konferencën e organizuar nga Forumi Rinor i Lidhjes Demokratike të Kosovës me rastin e Ditës Ndërkombëtare të Rinisë. Përfaqësues të institucioneve të vendit premtuan angazhim më të madh në këtë drejtim.
Në Ditën Ndërkombëtare të Rinisë,përfaqësues të strukturave rinore në vend kërkuan që institucionet të krijojnë më shumë hapësirë në mënyrë që ata të mund të jenë të përfshirë në proceset vendimarrëse dhe të japin kontributin e tyre në rrugën e integrimeve të vendit.
Përfaqësues të institucioneve të Kosovës thanë se edhe vetë organizatat rinore duhet të ngrisin zërin e tyre në mënyrë që të ky zë të dëgjohet nga institucionet.
Në këtë konferencë të organizuar nga Forumi rinor i LDK-së, u tha se Kosova ka potencial të jashtëzakonshëm, pasi mbi 50% e popullatës është e moshës së re. Ata shtruan nevojën e shfrytëzimit të këtij potenciali si garantues i një të ardhme integruese.