Eliza Hoxha:” E veçantë, në relacion me të tjerët

Tashmë klipi “Dëshpërimi” është plasuar nëpër media. Çfarë mund të na rrëfesh më shumë rreth zhvillimit të ngjarjeve dhe realizimit të tij?
Klipi është realizuar në Prishtinë me produksionin ‘Pixels’, të cilët i falënderoj për një bashkëpunim profesional dhe kënaqësi gjatë realizimit të tij, e i cili u punua pa stres dhe nguti. Për faktin që harxhuam shumë kohë në konsumimin e këngës për të kornizuar konceptin e ngjarjes që do vizuelizonte këngën, gjithçka tjetër nga ana teknike shkoi mirë dhe pa problem. Tendenca ishte që klipi të sjellë në pah një gjendje emocionale që reflekton edhe kënga, dhe me një qetësi imponuese klipi arrin ta bëjë këtë efekt tek ata që e konsumojnë këngën përmes mediumeve elektronike vizive.

Sa i keni kushtuar rëndësi regjisë në këtë klip. Sa përshtatet ajo me tekstin e këngës?
Klipi e ilustron këngën në dy dimensione: në sensin metaforik përmes dy personazheve që sjellin botën e brendshme të secilit nga ne dhe dimensioni real si pasojë e të cilit vjen gjendja dëshpëruese ndaj ndonjë gjëje apo dikujt. Mendoj se me pak imazhe dhe lojë, klipi ka arritur ta shtyjë mesazhin e këngës tutje.

Po përgatitjet për albumin kanë përfunduar?
Albumi është veç në përfundim e sipër dhe do të shikoj se cila do të jetë periudha më e përshtatshme për ta promovuar atë.

Mundohem të përkrahë Elizën e muzikës

Çfarë do ta veçojë këtë album nga dy të parët e Elizës?
E rëndësishme për mua është të jem e veçantë si Elizë, në relacion me të tjerët.

Po me çfarë do të jetë i njëjtë me dy të parët?
Sepse është Eliza, ha-ha-ha.

Për dallim nga shumica e këngëtarëve ju më pak ekspozoheni, qoftë në mbrëmje muzikore brenda apo edhe jashtë vendit, qoftë në evenimente tjera të tilla. Nuk keni preferuar vetë të bëheni pjesë e këtij rrethi apo ka edhe ndonjë arsye të dytë?
Unë punoj në Universitet dhe bëj punë të tjera profesionale në fushën e urbanizmit që më sjellin në një pozicion me një përgjegjësi të madhe publike. Andaj jam shmangur nga këto lloj aktivitetesh dhe paraqitjesh, duke synuar në një dimension të ri të paraqitjes së Elizës në muzikë.

Duke mos preferuar pjesëmarrjen në këto mbrëmje, si arrini të siguroni mjetet për të realizuar këngë, klipe dhe album, kur dihet se përfitimet nga muzika po rrezikohen shkaku i piraterisë?
Është shumë e vështirë të jetosh nga muzika moderne nëse nuk bënë kompromise në sensin e asaj që e dëgjojmë shpesh ’se kështu e ha pazari’. Unë më shumë mund dhe punë në anën tjetër profesionale mundohem të përkrahë Elizën e muzikës.

Një fenomen tjetër që ka filluar të rritet me të madhe tek ne janë edhe duetet muzikore. Ju ishit një nga këngëtaret që shumë vite më parë sollët një duet (me Xuxin), ndërkohë që kur të gjithë bëjnë një gjë të tillë, ju nuk i riktheheni. A mendoni ta thyeni këtë ‘rregull’?
Nuk e di për çfarë rregulle e keni fjalën?! Bashkëpunimet për mua nuk mund të bëhen sepse tani e kanë rëndësinë e tregut aktual, por ato duhet të jenë refleks i nevojës për të punuar bashkë me dikë me të cilin/cilën ndajmë interesa të përbashkëta muzikore dhe mendësinë mbi trendet aktuale si qëllim dhe për të krijuar një vepër të bukur.

Shumë këngëtarë kanë filluar të japin definicione për muzikën tallava. Jo rrallë edhe ta mbrojnë atë. Çka është muzika tallava për ju?
Nuk shoh asnjë motiv më të voglin për ta komentuar.

Me kalimin e kohës disa gjëra bien nga lista e angazhimeve

Ke treguar se ke talent për shumë fusha. Ku tjetër do të doje ta sfidoje vetën?
Mendoj se kam eksploruar mjaftë dhe me kalimin e kohës disa gjëra do të bien nga lista e angazhimeve të mia për të marrë primatin ato që kanë qëndrueshmërinë kohore, profesionale dhe financiare.

A ke ndarë mendjen për ndonjë pushim jashtë vendit?
Ende jo. Deri në fund të gushtit kam shumë angazhime dhe e kam të pamundur të lëvizë jashtë Kosovës. Për më tutje nuk e di.

Keni treguar se keni hyrë në kredi për të blerë një banesë. A keni arritur ta ktheni borxhin, dhe na thuaj pakëz, si është të jetosh vetëm?
Kam edhe tre vjet të kredisë, që kanë mbetur për të shlyer borxhin total të banesës.

Sa i mirëpret mysafirët si ‘zot’ shtëpie?
Ende nuk jam shpërngulur në banesën time.

Përveç me albumin e ri, me çfarë tjetër e pritët verën?
Verën e hapa me pjesëmarrjen time në bienalen e artit në Venecia me projektin e Mitrovicës si pjesëmarrësja e parë me nënshkrim nga Republika e Kosovës, emocion të cilin vështirë se mund ta përshkruaj. Përndryshe, edhe çfarëdo pune tjetër që bëjë në një formë apo tjetër, patjetër se lidhet me botën e artit.

Të kërkohesh në botën e muzikës pa disa elemente ekstravagance duket të jetë bërë e vështirë në tregun muzikor tek ne. Sa iu bezdis një fakt i tillë dhe si ia keni dalë mbanë në këtë ambient ku dominon pamja vizuale e mungojnë vlerat vokale?
E para varet se çfarë nënkuptojnë njerëzit me ‘ekstravagancë’ ngase ajo nuk nënkupton medoemos zhveshjen dhe imazhin e një femre të klubeve. Ndonëse imazhi është dimension me rëndësi të veçantë gjithandej, dallimi i tregut jashtë nga i yni është se atje imazhi pa përmbajtje shuhet shpejt, përderisa këtu imazhi duket të jetë kriteri i vetëm i mbijetesës së shumicës. Po të bezdisesha aq shumë për konditat e tregut muzikor aktual, sigurisht se edhe unë do të minimizoja rrobat e mia dhe do të lija primatin në pamjen ha-ha-ha. Unë e kam të qartë rrugën time në muzikë, e di çfarë dua, ku dua të arrij dhe si. Të tjerat i mbetën kohës e cila tek ne aktualisht është i vetmi element që dikur do të filtrojë dhe do të sistemojë vlerën dhe vendin e secilit.

thnx