Vesa Luma : Çmenduritë e adoleshencës sime...

Të gjithë sot e njohim atë si këngëtare të famshme, por pak dinë se Vesa në adoleshencën e saj ka pasur një grup muzikor të rokut, ku ajo nuk ka qenë vokaliste, por ka luajtur në bateri. Pikërisht në këtë moshë ajo ka korrur suksese të mëdha...

Si e kujtoni kohën e adoleshencës?
Koha e adoleshencës ka qenë koha kur unë kam marrë vendime për shumë gjëra. Në fakt, ka qenë koha të cilën e kam përjetuar më së shumti, duke qenë se kam bërë shumë-shumë gjëra, të cilat tani kur i kujtoj, habitem për guximin që kam pasur. Megjithatë, asnjëherë nuk jam bërë pishman, sepse kam qenë thjesht një adoleshente.

Sa jeni shoqëruar me shokët dhe shoqet? Keni ndonjë shok apo shoqe me të cilët jeni shoqëruar më shumë?
Duke qenë se gjatë asaj kohe kam hyrë në punë në televizion, emisioni me të cilin unë kam filluar të punoj, më ka dhënë mundësi të njoh shumë njerëz. Pothuajse gjatë gjithë kohës kam qenë e shoqëruar me njerëz të ndryshëm dhe kjo më ka dhënë shumë mundësi të piqem edhe personalisht, por edhe profesionalisht. Me shumë shokë me të cilët jam shoqëruar atë kohë, shoqërohem edhe tani.

Si adoleshente, ku e keni kaluar kohën e lirë?
E mbaj mend shumë mirë që kohën e lirë e kam kaluar në një qendër rinore, ku kishim mundësi të argëtohemi me shumë gjëra. Në atë kohë u vendos dhe interneti. Po ashtu, kam pasur një grup rroku, ku unë dhe 4 shoqet e klasës sime kemi performuar në mbrëmje të ndryshme dhe unë nuk isha vokalistja e grupit, ashtu siç ndoshta e imagjinoni, por isha bateriste. Kjo ka qenë vetëm një nga "çmenduritë" e shumta që mbaj si kujtim shumë të bukur të asaj kohe.

Ku i keni kaluar pushimet?
Pushimet atë kohë i kam kaluar me familje, edhe pse kam punuar dhe kam fituar aq sa të mund të kaloj pushimet me shoqëri, pa e detyruar familjen për ndonjë gjë. Mirëpo, kam respektuar vendimin e familjes që, përderisa isha në një moshë kritike (edhe pse mjaft e pjekur për moshën që kisha), nuk duhej të rrezikoja të merrja një vendim të tillë, ku mund të kishte pasoja.

Me çfarë problemesh jeni ballafaquar?
Edhe pse gjenerata ime ka përjetuar kohën e luftës, tranzicionit, përveç problemeve të tilla, nuk jam ballafaquar me ndonjë problem serioz, siç janë ballafaquar disa bashkëmoshatarë të mi. Këtu e kam fjalën për një fenomen aktual, i cili lind kryesisht në atë moshë, e që është droga. E di që në atë moshë kjo më është dukur shumë qesharake, por me kalimin e kohës, duke parë ngecjen e tyre në shumë aspekte të jetës, kam kuptuar që ky është një problem shumë serioz, për të cilin shoqëria duhet të japë maksimumin që ta parandalojë.

Si e keni menduar ju një lidhje dashurie në atë moshë?
Përfundimisht, jo si e mendoj tani. Por, ka shumë ngjashmëri. E rëndësishme është që ende mendoj se duhet të luftosh për atë që e do, dhe që dashuria është gjëja më e çmuar që mund të ta dhurojë Zoti.

A e kishit menduar që mund të kishit kaq famë, të cilën e keni sot?
Kam kënduar si fëmijë dhe si fëmijë kam pasur shumë ambicie për artin në përgjithësi, jo vetëm për muzikën, por gjatë kohës së adoleshencës kur kam filluar të mendoj më seriozisht për këtë gjë, nuk kam besuar që do të kem aq forcë për të mbajtur një status të këtillë. Më vjen mirë që nuk kam pasur kohë të mendoj a do të jetë vështirë apo lehtë, sepse vetë koha dhe puna më kanë sjellë në këtë pozicion.

Cili ka qenë momenti më i lumtur dhe më i hidhuri gjatë asaj kohe?
Më besoni se ka pasur shumë momente të lumtura. Ka qenë koha e sukseseve të mia më të mëdha, por në të njëjtën kohë nuk jam ndier komplet, duke qenë se në atë kohë kam humbur edhe njeriun më të afërt, babin tim. Por, unë besoj se ai do të ndihej krenar për guximin dhe ambicien time për të arritur sukses.

Cilat janë dallimet e adoleshentëve të kohës suaj me këta të sotshmit?
Nuk besoj se do të ekzistojë ndonjëherë dallimi në mes adoleshentëve në kohë, sepse kudo dhe me këdo që kalohet ajo kohë, besoj se do të mbahet mend shumë gjatë.

ok.///

flm per informacionin edona