Prano Kosovën në Facebook

Anëtarët e forumit të internetit “Webmaster Kosova” kanë nisur një projekt me qëllim të njohjes së Kosovës online.
Aktualisht PranoKosoven.com do t’i dedikohet njohjes së Kosovës në rrjetin e njohur online për shoqërim Facebook, ku deri më 30 shtator do të mblidhen nënshkrime dhe atëherë, këtij shërbimi do t’i drejtohet një e-mail me kërkesë zyrtare nga projekti PranoKosoven.com.

Versioni në gjuhën angleze www.AcceptKosovo.com do të jetë online më 14 shtator, pasi që aty do të ketë informata më të shumta dhe duhet të përshtatet për vizitorët e huaj.

Projekti si i tillë ka për qëllim të jetë afatgjatë. Peticioni primar do të jetë që Facebook ta njeh Kosovën, derisa do të vazhdohet me të njëjtën gjë edhe për shërbimet tjera online si: Hotmail, Gmail, Twitter etj.

Ideatorët besojnë se do t’ia arrijnë qëllimit të tyre dhe thonë se nuk do të rehatohen derisa çdo faqe re e internetit e cila krijohet të ketë në listën e shteteve edhe Republikën e Kosovës. Ideja ka rrjedh nga Besnik Hajredini dhe Qëndrim Ahmetaj para dy muajsh të cilët apelojnë për mbështetje në qëllimin e tyre.