Antibiotikët dhe ëmbëltuesit nxisin ndjeshmëri të madhe ndaj diellit

Ndjeshmëria e lëkurës ndaj rrezeve të diellit apo foto-ndjeshmëria, manifestohet me paraqitjen e formave të ndryshme të të skuqurave, djegieve, puçrrave dhe të kruarit dhe atë më së shpeshti në pjesët e trupit që kanë qenë të ekspozuar ndaj diellit, e nganjëherë edhe më gjatë.

Forca e reagimit varet nga individi, preparati i cili e ka shkaktuar dhe sasisë së kohës së kaluar në diell. Edhe me mbrojtjen e duhur me preparate për rrezitje, ilaçet e caktuara, shtesat natyrale të ushqimit, parfumet, disa prodhime për përkujdesje ndaj lëkurës, por edhe ushqimi, mund të shkaktojnë ndjeshmëri të lartë të lëkurës ndaj diellit, thonë dermatologët. Për të ditur nëse ilaçi që e përdorni shkakton alergji ndaj diellit, gjithsesi lexoni udhëzimet që vijnë me to, apo pyeteni punëtorin e barnatores apo mjekun. Në mesin e ilaçeve që shkaktojnë foto-ndjeshmërinë, përfshihen edhe antibiotikët si amoksicilina, doksiciklina, minociklina, sulfonamidi dhe të tjerë. Aty janë edhe disa antihistamine (cimetidini, ranitidini...), diuretikët (acetazolamidi, furosemidi...), antidepresivët, antipsikotikët, hipoglikemikët dhe ilaçet kundër shtypjes së lartë.

Ushqimi i cili është mirë të shmanget
Në mesin e ushqimeve që mund të shkaktojnë reagime alergjike ndaj rrezeve të diellit, renditen edhe selino, limoni, portokalli, kopra, majdanozi dhe ëmbëltuesit artificialë.

Lartësia e faktorit për mbrojtje
Nëse nuk mund të shmangni ekspozimin në diell, përdorni preparate me faktorin më të ulët mbrojtës 15. Personat me lëkurë të bardhë, duhet përdorur faktorë prej 30 e më lartë.

Leckat e ftohta dhe ndihma e mjekut
Nëse ju zhvillohet një reagim, evitoni diellin dhe preparatet që e kanë shkaktuar dhe vendosni lecka të ftohta. Sugjerohet edhe ndihma dhe këshillat e mjekut.