Toka, skenarët e shkatërrimit

Ndryshimet klimaterike dhe turizmi po vënë në rrezik gjithnjë e më shumë planetin. Ndryshimet klimaterike dhe turizmi në masë mund të çojnë në shkatërrimin e disa prej vendeve më të bukura të Tokës. Faktin në fjalë e denoncon një studim i "Future of World Travel", e mandatuar nga "Churchill Insurance" dhe publikuar në Britaninë e Madhe.

Sipas këtij kërkimi, në vendet e Mesdheut nxehja e tepërt e planetit mund të modifikojë klimën deri në atë pikë sa të rikrijojë në disa rajone të Spanjës dhe në Juglindje të saj, zona të përshtatshme për mushkonjat anofele, me rrezikun e përhapjes së malaries. Problemet janë shumë të mëdha dhe këto vihen re edhe në Itali, ku zona më e rrezikshme është Toskana dhe ajo bregdetare, që janë një teatër gjithnjë e më shumë në rritje të zjarreve të papritura nga temperaturat e larta. Të njëjtin rrezik ka edhe Greqia, ku raporti parashikon një rritje të ndjeshme të vdekjeve, për shkak të rritjes së madhe të temperaturave gjatë muajve të verës.

Në Athinë, për shembull, Akropoli mund të pësojë dëme për shkak të turizmit, një fenomen që është i destinuar të përziejë edhe fizionominë e bregdetit dalmat në Kroaci, ku invazioni i turizmit në dhjetëvjeçarët e ardhshëm do të jetë përgjegjësi indirekt i një bumi në konstruksionin e hotelerisë, e cila shpeshherë është e egër dhe e pakontrollueshme. Ndotja mund t‘i shkaktojë dëme të pariparueshme katedrales së Këlnit, në Gjermani, e cila që tani konsiderohet në rrezik, por kontinenti aziatik është ai që rrezikon më shumë, për shkak të erozionit të provokuar nga rritja e temperaturave dhe niveli i deteve e oqeaneve. Barrierat koralore të Taj, në arkipelagun e Maldive, mund të dëmtojnë rëndë ujërat që shkaktojnë turbullime të shumta, siç edhe ka ndodhur në të vërtetë. I njëjti fenomen rrezikon të godasë edhe Australinë, ku dëmet e barrierave koralore janë parashikuar edhe për shkak të rritjes së trafikut të anijeve.

Dëme në bregdet dhe erozion mund të pësojnë edhe plazhet në Goa të Indisë, të provokuara këtë herë nga ciklonet gjithnjë e më të shpeshta, ashtu si edhe në Amerikë, ku për shkak të uraganeve janë në rrezik Everglades, një ekosistem i kënetave, liqeneve dhe rërës së lëvizshme, unike në të gjithë botën edhe për bimësinë dhe kafshët. Pas pak vitesh, më saktë rreth vitit 2020, në luginën Kathmandu, në Nepal, rrezikohet që fluksi i turistëve të zhduket fare. Do të jetë e domosdoshme që të vendoset një limit për numrin e vizitorëve dhe të stabilizohet një masë fikse, e cila do të evitonte mbushjen e tepërt, që me kalimin e kohës mund të krijonte edhe rrezikun e ndotjes së ambientit.

E njëjta gjë është vënë re edhe në Peru, në qytetin Machu Picchu. David Viner, një nga klimatorologët më të njohur në Mbretërinë e Bashkuar, në një intervistë për "Indipendent", thotë se ndryshimet kanë filluar dhe janë të destinuara që me kalimin e kohës të shkaktojnë modifikime të thella, në tendencën e fluksit të turistëve, duke parë që temperaturat e shënuara në vitin 2080, në Gjermani dhe Britaninë e Madhe do jenë ato që regjistrohen sot në vendet e Mesdheut.