Fabula-nga Ferit Lamaj

Celular

Buzë liqenit, në batak
Një bretkosë “kuak, kuak!”
Papushuar ditë e natë.
Pu-pu ç’zhurmë e shamatë...

Celularin çel një midhje:
- Boll me zë, kalo me dridhje...


E hëna

Një të shtunë në pulari
Thirri gjeli: “Ki, ki, ki!
Sot, moj pula, është e shtunë.
Por të hënën kemi punë,
Dua vezë pa hesap…”

Pikaloshja sqepin hap,
I qet llafet me çengel:
“Po sikur të bjerë e diel?!”


Arma

I thonë njërit në doganë:
- Ke me vete ndonjë armë?

Tjetri llafet fët i bluan:
- Armë the?! Jo, jo, kam gruan


Lëkurë

Ditë e diel, zien tregu,
Kafshë, shpesë, punë e madhe...
- Hajt, lëkurë, lëkurë shelegu!-
Seç ngjir zërin një kunadhe.

Pak më tutje një zë tjetër:
- Lëkurë dhie, lëkurë dhie!-
Dyqanxheshë zonja dhelpër,
I jep fare veresie.

Teksa tregu ndizet furrë,
"Pësh - pësh" flutura me bletën:
- Hej, ç'qyfyre me lëkurë!
Askurrkush nuk shet të vetën...

Dosa derrit gjithë inat:
- Ngele klubit për çdo natë!

Skuqet derri pijanik:
- Nuk rri kot, shijoj muzikë.

- Do muzikë? – dosa flet, -
Shkojmë në opera, koncert…

Derri llafet breshëri:
- Ka muzikë, por s’ka raki!...