Mbaroi misioni i Feniksit në Mars

Feniksi punonte thuajse dyfish më gjatë se periudha e parashikuar, që prej se ateroi në sipërfaqen e Marsit më 25 maj të këtij viti.

Misioni duhej të zgjaste tre muaj, por qëndroi më shumë se pesë muaj. Terri dhe dimri i ftohtë që tash më filloi në Planetin e Kuq, po e pengon furnizimin me rrymë të sondës, e cila punon në energji solare. Pritet që akulli ta mbulojë sondën ndërsa temperaturat prej – 100 gradë, dukshëm do ta shkatërrojnë pajisjen.

Dora robotike e sondës e para nga të gjitha misionet, në Mars arriti që të gjejë ujë të ngrirë vetëm disa centimetra nën sipërfaqe. Është gjetur edhe kalcium karbonat që në planetin tonë është pjesë përbërëse e sipërfaqeve gëlqerore. U zbuluan edhe grimcat e glinës.

Zbulimi është i rëndësishëm pasi këto minerale formohen vetëm në prani të ujit në gjendje të rrjedhshme që megjithatë është parakusht për jetën organike. Kamera e sondës Feniks madje regjistroi edhe borë në Planetin e Kuq. Janë incizuar më se 25 mijë fotografi, kurse shkencëtarëve do t'u nevojiten disa dekada për analizën e të dhënave të grumbulluara.